Ang pagtutol nang walang pagkilos ay pagsang-ayon

ANG PAGTUTOL NANG WALANG PAGKILOS AY PAGSANG-AYON

"Dissent without action is consent" anang kasabihan

ah, ito'y matalim at malalim na kaisipan

batayang pangangailangan na'y nagmamahalan

tulad ng bigas, tubig, kuryenteng dapat bayaran

tutol ka sa ganito pagkat masakit sa bulsa

apektado na ang badyet mo para sa pamilya

ngunit magagawa mo bang tumutol nang mag-isa?

sa mga hirap at daing mo kaya'y pakinggan ka?

kaya may kilos-protesta na pagkilos ng tao

sa sama-samang pagkilos, may maipapanalo

kung tutol ka ngunit ayaw lumahok sa ganito

paano maisasatinig ang hinaing ninyo

tama namang magpetisyon, sama-samang isulat

sa kinauukulan ang daing ng masang lahat

di ba't sa sama-samang pagkilos kakamting sukat

upang mapababa ang presyong sa bulsa'y kaybigat

ang pagtutol nang walang pagkilos ay pagsang-ayon!

sabi ng matatanda noon magpahanggang ngayon

tutol ang kalooban, sa hirap na'y binabaon

ngunit sa sama-samang pagkilos ay di kaayon?

tumututol ngunit takot sagupain ang mali?

tila paghihirap nila'y nais mapanatili?

bakit di kumilos, kalampagin ang naghahari

sa sama-samang pagkilos makakamit ang mithi

- gregoriovbituinjr.

11.08.2022

Bungo

BUNGO

William Shakespeare at Edgar Allan Poe

dalawang makatang aking idolo

dalawang magaling sa pagkukwento

ilang tula nga nila'y sinalin ko

subalit bakit bungo ang pabalat

ng aklat nitong dalawang alamat

dahil ba sila'y nawala nang sukat

ah, anong ganda ng kanilang aklat

yaong sa libro nila'y nawiwili

mauunawa marahil ang siste

si Poe ay writer ng horror story

minsan, mambabasa'y di mapakali

si Shakespeare ay may multo sa kinatha

sa Macbeth, Hamlet, at iba pang akda

Julius Caesar, Richard III't Henry VI nga

kaya sila'y ating nauunawa

bungo ay sagisag ng kamatayan

o marahil multo ng kaapihan

na sa mga akda'y inilarawan

na noon ay binasa't naramdaman

- gregoriovbituinjr.

11.08.2022

Layon ng makatang tibak

LAYON NG MAKATANG TIBAK

kathang tula'y upang / bigkasin sa madla

iyan ang layon ko / pag nagmamakata

isyung panlipunan / ay ipaunawa

sa uring obrero't / kapwa maralita

ano ba ang tula / para sa kanila?

na kapag may sukat/  at tugma'y sapat na?

mensaheng hatid ba'y / unawa ng masa?

prinsipyo't ideya / niya'y malinaw ba?

magmulat ang layon / ng makatang tibak

katulad kong ayaw / gumapang sa lusak

layon kong itanim / sa lupa't pinitak:

binhi ng pag-asa / sa mga hinamak

itula ang buhay / ng dukha't obrero

pag minuni-muni'y / kayrami ng kwento

ng pakikibaka't / kanilang prinsipyo

nasa'y karapata't / hustisya sa tao

patibayin nila / ang prinsipyong tangan

umaasang kamtin / yaong katarungan

igalang ninuman / bawat karapatan

ang armas ko'y tula, / kayo'y ano naman?

- gregoriovbituinjr.

11.07.2022

Liwayway

LIWAYWAY

koleksyon ko ng mga huling sipi ng Liwayway

dati'y malaki, subalit pinaliit nang tunay

gayunman kaygaganda pa rin ng sinasalaysay

sarap basahing kwento, nobela, tula, sanaysay

dati, pabalat ay larawan ng mga artista

ngayon, napalitan ito ng mga ipininta

dati, animnapung pahina, ngayon, sandaan na

dati, lathala lang, ngayon, may bersyong internet pa

pinagmamalaki kong laki ako sa Liwayway

bata pa'y lagi nang bumibili nito si Tatay

bukod sa lansangan ay dito kami tumatambay

binabasa ang mga akdang napakahuhusay

ngayon ang ikasandaan nitong anibersaryo

nilathalang panitikan at kultura'y narito

sa agos ng kasaysayan ay naging saksi ito

kaytagal nang babasahin sa wikang Filipino

magasing pampamilya mula noon hanggang ngayon

nawa'y manatili kayong babasahin ng nasyon

magpatuloy pa sa ikadalawang daang taon

o ikalawang sentenaryo ay abutin iyon

nawa'y patuloy na sumikat ang bukang liwayway

na laging kasangga sa pagitan ng tuwa't lumbay

sa lahat ditong nagsusulat, mabuhay! mabuhay!

tanging alay sa inyo'y taospusong pagpupugay!

- gregoriovbituinjr.

11.06.2022

Aklat ni Gary

AKLAT NI GARY

"Makibaka, Magdiwang, Magmahal", kaygandang libro

ng manganganta't makatang sa marami'y idolo

aklat ni Gary Granada, maigi't nabili ko

buti't may pera sa bulsa nang matsambahan ito

sikat niyang kanta'y nalathala dito na tula

tulad ng Bahay, Dam, Holdap, Puhunan, Manggagawa

Kung alam mo lang Violy, Rehas, Kung ika'y wala

Makibaka, Huwag Matakot!, kaygagandang akda

di lang collector's item kundi mahalagang aklat

hinggil sa hustisyang asam, karapatan ng lahat

tulang inawit, dinggin mo't may isinisiwalat

sa mga tulawit ni Gary, maraming salamat

Makibaka at kamtin ang panlipunang hustisya

pawiin ang pang-aapi at pagsasamantala

Magdiwang na bagamat dukha, tayo'y narito pa

ramdam man ay dusa't luha, patnubay ay pag-asa

Magmahal, ngunit di ng mga presyo ng bilhin

kundi punuin ng pag-ibig itong mundo natin

pakikipagkapwa tao'y layon nati't gagawin

halina't kumilos nang lipunang patas ay kamtin

- gregoriovbituinjr.

11.04.2022

Anyubog

ANYUBOG

mananatili ang pag-ibig

kung may ilalaman sa bibig

mabuti pang bilhin mo'y bigas

kaysa laging kumpol ng rosas

isipin mong pag nasa dilim

liwanag ay makakamtan din

huwag mawalan ng pag-asa

lalo'y iyon lang ang meron ka

sa tingin ako'y makuha man

ay dahil ikaw ang namasdan

mga anyo'y nagkakahubog

lalo na't araw na'y lumubog

sa liwanag ay may anino

iba't ibang hugis man ito

at kung anino na'y nawala

dilim ba'y lumukob nang sadya

- gregoriovbituinjr.

11.03.2022

Maging tinig ng api

MAGING TINIG NG API

anong magagawa mo sa kanilang walang tinig

habang panaghoy at hinaing nila'y naririnig

magsawalang kibo ba't kunwa'y walang naulinig

hindi, kundi sa kanila'y makipagkabitbisig

kung di nila masabi ang kanilang dinaranas

kung di rin nila maisatinig ang pandarahas

tayo na'y magsilbing tinig nila upang malutas

ang kanilang hinaing, lipunan man ay di patas

kung magagawa para sa kanila'y magsalita

ay ihiyaw natin ng buong pagpapakumbaba

ang kanilang mga hibik at sanhi ng pagluha

ang karapatan nila'y ipaglaban nating kusa

sabi sa Kartilya, ipagtanggol ang inaapi

kasunod pa nito'y kabakahin ang umaapi

kung magiging tinig ng api, huwag maging pipi

maging boses ng maliliit, sa masa magsilbi

- gregoriovbituinjr.

11.02.2022