Kayrami mong bugtong na nais naming makatugon
O dapat ba naming sagutan ang katha mong bugtong
Habang pinagdiriwang mo ang kaarawan ngayon
Ay humahapon naman sa puno ang laksang ibon
Habang bugtong mo'y sinusuri, kahit walang sirit
Bawat mong bugtong ay mga kathang sa diwa'y sulit
Bawat tula mo'y may dangal para sa maliliit
Habang naglalantad ng katotohanang kaylupit
Tulad ng sastreng humahabi ng mga salita
Sinusukat muna ang telang tatahiing sadya
Karayom, sinulid, at makina'y inihahanda
Hanggang matahi ang kasuotang nais ng madla
Salamat sa iyong mga tula, makatang Dodie
Nawa sa pagkatha ay patuloy kang manatili
Tulad ng sastreng sadyang kayhusay sa pananahi
Sa kaarawan mo, ako'y naritong bumabati
- gregoriovbituinjr
06.04.2021
Walang komento:
Mag-post ng isang Komento