PAGGISING SA UMAGA
isusulat ko pa rin ang bulong ng puso
kahit na ang sinta'y naroon sa malayo
o naririto sa tabi't aking kasuyo
lalo na't pag-ibig nama'y di naglalaho
kapara ng tula paggising sa umaga
bago mag-almusal o nag-uminat muna
tula ang kinakape't pinapandesal pa
kakathai'y nasa panaginip kanina
iyon ay kung matatandaan ang naisip
na pagkamulat pa lang ay agad nahagip
may talinghaga kaya roong nasisilip
at agad tinala sa notbuk ang nalirip
nagtungo ang diwata sa dalampasigan
nakapanguha ng masarap na halaan
wala bang tambakol, tulingan o gulyasan
na masarap ihanda sa pananghalian
- gregoriovbituinjr.
12.17.2023
Walang komento:
Mag-post ng isang Komento