HAPUNAN KO'Y POTASYUM
taospusong pasasalamat
sa nagbigay nitong potasyum
tiyak na rito'y mabubundat
bigay mula sa isang pulong
dalawang turon ang narito
at dalawang tila maruya
kailangan talaga ito
ng katawan kong kaynipis nga
pampalakas daw nitong puso
pati na ng mga kalamnan
pangontrol ng presyon ng dugo
pabalanse rin ng katawan
kaya di na ako nagsaing
di na rin bumili ng ulam
dahil sapat na itong saging
na sa gutom ko'y nakaparam
salamat sa potasyum na bigay
sapagkat may panghapunan na
upang makakatha pang tunay
ng tulang tulay ko sa masa
- gregoriovbituinjr.
12.02.2025
Walang komento:
Mag-post ng isang Komento