KATHA'T NILAY
nagpapasalamat akong totoo
sa bawat kasama't mga katoto
na sa maraming labanan at isyu
ay nagkaisang magtagumpay tayo
pag may isyu nga akong natitisod
susuriin, aalamin ang buod
gagawan na ng tula't ia-upload
kapara ng busóg, palaso't tunod
pag sa mga isyu'y di mapalagay
ay magsasaliksik ng walang humpay
habang prinsipyo'y isinasabuhay
at hanay ay ating pinatitibay
makatâ mang walâ sa toreng garing
iwing diwa'y mananatiling gising
trapo't burgesya man ay sumingasing
ang masa'y di mananatiling himbing
salamat, kadukha't kamanggagawà
sa tulong kahit daanan ng sigwâ
kakathâ at kakathâ ang makatâ
bilang ambag sa layuning dakilà
- gregoriovbituinjr.
01.17.2026
Walang komento:
Mag-post ng isang Komento